Eth jòc dera Balena - aigaberdenc, occitan,bigorre, institut d'estudis occitans, institut d'études occitanes, IEO, Lavedan, Argelès-Gazost

Culher

Se coneishetz eth jòc dera Balena ?

Qu'èi posat era question a mantuas personas, totas qu'an arresponut que non coneishèvan pas aqueth jòc...

Quan èri mainada, tres cosias e dus cosins que desbarcavan de Normandia entà passar eras vacanças d’estiu a noste. Era telé non i èra pas encòra arribada en Arrens e, entà ocupar eras seradas, mamà que nse hageva jogar ara balena.

Mamà que miava eth jòc : que i èra era Balena. Nosautis eths sheis mainats que causívam, cada un, un nom d’ustensile de cosina, per exemple : caceròla, padena, coquèla, cautèr, culher, cotèth, etc... Eth jòc que començava.

Balena que disèva : « Era Balena que se’n va par ci, per la, se’n va minjar a... padena »(per exemple).

Pedena qu’ageva a díser viste : « Non, pas padena, non ».

Balena que disèva : « E donc ? »

E Padena que designava un aute jogaire qui devieva viste díser : « Non, pas a ..., non ». Era Balena que disèva : « E donc ? » un aute nom que ièra aperat e atau en seguint...

Eth qui non arresppnieva pro viste o qui no’s brembava deths noms deths autes que ièra eliminat.

Eth qui ganhava que ièra eth qui ièra atentiu, arreactiu e rapide. Era Balena que pòt estar eliminada tanben, si’s desmembra de díser « E donc ? » per exemple.

No’m demandetz pas perqué s’apèra eth jòc dera Balena, ne tanpòc perqué causeishen noms d’ustensiles de cosina, non ac sèi pas...

Entà hèr apréner aths mainats, que’s poderén causir tanben noms de verduras, de flors, de fruts, d’animaus, perqué pas ?

E quan n’agévam hartèra de jogar ara Balena, que cantàvam o que dançàvam tanben...

Terèsa de Bagès